مقالات إيهاب ماجد

مقالات

صحيح علمانى

صحيح علمانى (كافر) !!

متدين اوى حب ينصح زميله العلمانى (الكافر) قاله

بقولك عاوز اكلمك شوية عن ربنا وعن الدين بتاعنا رد عليه العلمانى

عاوزنى اعرف عن دينك وعن اللى بتعبده ؟

خلينى اشوفك فى شغلك ؟

عاوز اسمع بيقولوا ايه عنك ؟

ازاى بتعامل زمايلك فى الشغل ؟

ازاى ىبتساعدهم على النجاح ؟

طب ازاى بتكسب فلوسك ؟

وازاى بتصرفها ؟

طب اقولك خلينى اشوفك فى بيتك

ازاى بتعامل مراتك ؟

هل هل ترفق بها ؟

بتعاملها كأنسانة زيك زيها ؟

ولا أقولك ازاى بتربى ولادك ؟

بتعلمهم يحبوا الأخر ؟

اقولك طب خلينى اشوفك بين الناس

عاوز اشوفك وسط جيرانك ؟

ازاى بتخدمهم ؟

ازاى بتراعى حقوقهم ؟

ازاى بتقوم بواجباتك تجاهم ؟

طيب ازاى بتتعامل مع الناس فى الشارع ؟

طيب ازاى بتبيع وتشترى ؟

طيب خلينى اسمع لغتك وطريقتك فى الحوار

خلينى اشوفك وقت غضبك ونرفزتك ؟

بتعرف تسامح بتعرف تغفر بتعرف تعفو ؟

خلينى اشوفك وانت محتاج

بتشكر بتحمد ربنا فى كل حال؟

خلينى اشوفك وانت فى قوتك

بترحم بتفتكر قدرة ربنا عليك ، بتتواضع ؟

مش عاوز اسمعك ....

عاوز اشوفك ....

وانا هعرف لوحدى دينك ايه وبتعبد مين

فالدين المعاملة

أرنى إيمانك بأعمالك




ما لا تعرفه عن الحياة

 ما لا تعرفه عن الحياة

هل تعى أمر الحياة ؟ للحياة حقائق اساسية لازم تعرفها ، لأنك لو مش عارفها هتتعب اوى فيها الحقيقة الاولى الحياة مرآة بتعمل ايه المراية ، بتعكس اللى موجود قدامها صح ؟ الحياة كده برضه بتعكس اللى موجود قدامها ، لحظة تلاقى الحياة سعيدة ولحظة تلاقيها تعيسة ، ايه اللى اختلف فى الحياة فى الحالتين ؟ ولا حاجة انت لما كنت سعيد كانت الحياة مراية لسعادتك ولما كنت تعيس كانت برضه بتعكس تعاستك الحياة تظهر لنا كما نحن أمامها الحياة عادلة عدل الحياة مظهر من مظاهر عدل ربنا ، ممكن تعتقد ان الحياة بتدى لمن لا يستحق والعكس ، معلش راجع نفسك كده الحياة تعطيك حسب افكارك وقناعاتك ونواياك ومهاراتك ممكن يكون عندك كل حاجة تستحق عليها اللى انت عاوزه بس ناقصك انك تصدق أنه ممكن ، هنا يبقى الحياة عادلة لانها هتديلك اللى انت مصدقه بس




" عندى خروجة مع الموزة "

من منكم يبحث عن عمل ؟

من منكم يعمل فى وظيفة لا يحبها ؟

جاءنى احد الشباب طالباً عملاً ، وخلال المقابلة معه قدم لى كل الاسباب التى جعلتنى اوافق على تعيينه لدينا لمدة خمسة عشرة يوم تحت الاختبار والتدريب كما اعتدنا .

قبل ان احكى لك قصة هذا الشاب دعنى اسألك ، ماذا تعرف عن فترة الخطوبة ؟ كما تعلمنا هى فترة أختبار يلاحظ فيها كل طرف الطرف الآخر ، يضعه تحت الاختبار ، ملاحظة دقيقة لمعرفة مميزاته وعيوبه ، وماذا يفعل كل طرف ؟ يحاول البعض اظهار افضل ما عنده واخفاء اسوء ما عنده ! اليس كذلك الحال ؟

وعندما يتزوج الطرفان اللذان اخفا كل منهما عن الآخر حقيقته ، فماذا يحدث ؟ ....... أنت تعرف بالتأكيد نتيجة هذا الخداع !

هذا بالضبط ما حدث مع هذا الشاب ، أول يوم تأخر عن موعده سألته : لماذا تأخرت ؟

الموظف : " معلش علشان اول مرة "

ولكنه فى خلال 10 ايام كان منهم 9 أول مرة ، اى انه تأخر 9 مرات فى العشرة ايام! وانت تتخيل الان انه التزم فى اليوم العاشر ؟!

آسف لانى سأخيب ظنك ، بعد اربعة ايام من عمله طلب أجازة ! نعم اجازة بعد اربعة ايام من بداية التدريب ، وكان سبب الاجازة ما لم استطع ان ارفضه " ظروف عائلية صعبة " فوافقت على الاجازة ، ولكنى اكتشفت بعد ذلك انها لم تكن ظروف عائلية صعبة وانما كانت حالة حب صعبة " عندى خروجه مع الموزة " على حد تعبيره لأحد الموظفين .

بالطبع انت تسأل ما مصيرهذا الشاب ؟

اعطيته مزيد من الوقت حتى يتفرغ " لموزته " مع اسفى الشديد لاستخدام هذه الالفاظ الغير مهذبة

الآن ما الذى تحتاجه لتنجح فى عملك ؟

ما أهمية العمل بالنسبة لك ؟

ماذا يحدث اذا كنت لا تحب عملك ؟

انتظر ردك على هذه الاسئلة وانتظرنى لتكملة مقالة " عندى خروجة مع الموزة "




ليه مفروض تعيش فرحان ؟

ليه مفروض تعيش فرحان ؟

و لو قدامك مراية وبصيت على شكلك... ممكن تقولى انتو ليه مبوزين كده ؟ ليه عاملين زى متكونوا شاربين مادة بتخشب الاعصاب والعضلات !

هتفولى مفيش حاجة تبسط .... كل الاخبار نكد فى نكد ..... خايف من بكره ...... زعلان على اللى حصل فى مصر ...... صديقى ضحك على ..... نفسى احقق احلامى

لو لاحظت الكلام ده كله هتلاقيه أما فى الماضى أو فى المستقبل ، أما تفكير فى الماضى وندم وحسرة على الماضى .

أو قلق وخوف من المستقبل ، من العادات والتقاليد السيئة اللى اكتسبناها من ثقافتنا وتربيتنا انك تندم على حاجة حصلت فى الماضى او تقلق على حاجة فى المستقبل .

قلى ممكن تعيش امبارح ؟ طيب ممكن تعيش بكره ؟ طبعاً لا !

اللحظة الوحيدة اللى تقدر تعيشها هى اللحظة دى ... دلوقتى ..... واللحظة دى بمعنى الكلمة مفيش فيها اى مشاكل ! كل المشاكل اما من الماضى او المستقبل

طيب قولى لو انت زعلان من الماضى او قلقان على المستقبل ايه هتكون مشاعرك فى اللحظة دى ... اكيد مش مبسوط ..صح ؟ طيب وانت مش مبسوط بتعرف تعمل اى حاجة بكفاءة ... طبعاً لا !

يبقى كده انت ببساطة هتعمل مشكلة تانية فى اللحظة اللى مفروض تعيشها فرحان .

ليه مفروض تعيش فرحان ؟

ليه مفروض تعيش فرحان ؟

ليه مفروض تعيش فرحان ؟

....

....

....

....

....

....

ليه مفروض تعيش فرحان؟

ليه مفروض تعيش فرحان؟

ليه مفروض تعيش فرحان؟

....

....

....

انا مش عارف انت ليه مفروض تعيش فرحان !

بس كل اللى اعرفه انك لو وضعت نفسك فى حالة استرخاء وهدوء وسألت نفسك وكررت السؤال 21 مرة.... ليه مفروض أعيش فرحان ؟ هتلاقى انك اصبحت فرحان !

لأن الاسئلة اللى بتسألها لنفسك بتؤثر على الطريقة اللى بتحس بيها وكمان طريقة تصرفاتك وما ستكونه فى المستقبل مرة زمان لقيت نفسى زعلان ومش عارف ليه .... اقعدت اسأل نفسى انا ليه زعلان ..... زعلان انا ليه زعلان ....انا ليه زعلان .. يا واد يا هوبه

لقيت عقلى عمال يجيبلى حاجات من سنين .... ومواقف كتير واسباب كتير ممكن تخلينى زعلان وحسيت ساعتها انى مش بس بقيت زعلان ده انا بقيت قرفان وزهقان ومخنوق وشوية وكنت هنتحر وأخلص من حياتى واريحكم منى .

فالعقل لازم يرد على اى سؤال انت بتسأله وبما ان كل واحد فينا عنده من التجارب والخبرات والمواقف الكتيرة جدا جدا واللى فيها حاجات تزعل كتيييير وحاجات تفرح كتيييييييييييير فالعقل هيديلك اجابة حسب سؤالك .

يعنى لو سألته انا ليه زعلان هيديلك اجابة ولو سألته انا ليه مفروض اعيش فرحان هيديلك اجابة ؟

علشان كده خد بالك من نوعية الاسئلة اللى بتسألها لنفسك ...

فى اسئلة ممكن تنقذك وفيه اسئلة ممكن تدمرك.

يعنى لو انت طالب بدل ما تسأل نفسك لو سقطت هيحصل ايه ؟...... اسأل نفسك ازاى انجح بتفوق ؟

بدل ما تسأل لو الاسئلة صعبة هاعمل ايه ؟...... اسأل نفسك ازاى استعد للأسئلة الصعبة ؟

لو انت موظف بدل ما تسأل نفسك هأعمل ايه لو مديرى فصلنى ؟ اسأل ازاى أتجاوز توقعات مديرى باستمرار ؟

لو انتى زوجة بدل ما تسألى نفسك هأعمل أيه لو جوزى طلقنى ؟ اسألى نفسك ازاى احول البيت لجنة تخليه يستمتع بحياته معاى ؟

السؤال بيحول نقطة تركيزك وبالتالى بيحول مشاعرك واحاسيسك والطريقة اللى بتتصرف بيها وكمان بيغير مستقبلك .

اسأل السؤال الصح وعقلك هيقولك شبيك لبيك .

بس انا فى الأخر مش عارف

ليه مفروض تعيش فرحان ؟

ليه مفروض تعيش فرحان ؟

ليه مفروض تعيش فرحان ؟




علشان بكره وبعده

علشان بكره وبعده

قولى ايه هيبقى حالك بعد 5 سنين ؟ هيكون مين معارفك بعد 5 سنين ؟ هيبقى ايه وزنك بعد 5 سنين ؟ هيبقى ايه مرتبك بعد 5 سنين ؟ هتسكن فين بعد 5 سنين ؟ ...... طبعاً انت هتقولى " دى حاجة فى علم الله ، هقولك طبعاً ربنا عارف .

طيب قولى هتصيف فين الصيف اللى جاى ؟ هتعمل ايه الاسبوع اللى جاى ؟ هتعمل ايه بكره ؟

هتعمل ايه بعد متخلص المقالة دى ؟

اكيد أجابتك اختلفت المرة دى ، اكيد عندك ولو فكرة بسيطة عن المكان اللى هتصيف فيه وعن اللى هتعمله بكره وعن اللى هتعمله بعد متخلص قراءة ! صح! مع ان كل الاسئلة دى اجابتها فى المستقبل وكله برضه فى علم الله ولكنك شبه متأكد من الحاجات اللى هتعملها فى المستقبل القريب !

لو نفسك يكون وزنك مثالى بعد 5 سنين

وتكون علاقاتك على أعلى مستوى

وتكون خبير فى مجال معين

ويكون مرتبك 5000 دولار فى الشهر .

ايه اللى انت بتعمله النهارده وبكره وبعده علشان توصل للى انت بتحلم بيه ؟ خلينا نتكلم عن مرتبك بعد 5 سنين كمثال يمكن تطبيقه على كل حاجة تانية انت عاوزها فى حياتك ، مثلاً لو عاوز مرتبك بعد 5 سنين يكون 5000 دولار، المرتب ده ما هو إلا نتيجة او محصلة لمجموعة كتيييرة من العوامل والعناصر اللى بتتفاعل مع بعضها البعض فى معادلة معقدة جداً ومرتبطة ببعضها بشكل يصعب معرفة الحدود الفاصلة بين تلك العناصر والعوامل ."ركز معاى و أقرأها تانى "

خلينى أبسطها اكتر من كده علشان تأخد مرتب 5000 دولار لازم تكون عندك معرفة متخصصة فى مجال معين ( مثلاً التسويق ، خدمة عملاء ، ميكانيكا ، سكرتارية ، كهرباء ، إدارة ، ......الخ ) وبتعرف تتعامل مع الناس بمختلف ثقافتهم ، وتعرف تشتغل فى فريق عمل وتعرف كمان تشتغل لوحدك وتعرف تشتغل تحت ضغط وتعرف تدير وقتك بفاعلية وبتعرف تتعامل مع المشكلات اللى ممكن تواجهك وتعرف تأخذ قرار وتكون منظم ودقيق وغيره كتير من العناصر والعوامل اللى هتخليك فى الأخر تقبض وتستحق تأخد 5000 دولار ، طيب كل الحاجات والمهارات دى هتتعلمها بعد انقضاء ال 5 سنين ولا من دلوقتى ؟

طيب ايه اللى انت بتعمله النهارده علشان بكره وبعده ، ايه المجهود المبذول المقصود المنتظم المستمر اللى انت بتعمله من النهارده علشان تكون خبير فى مجال معين بعد 5 سنين ، ايه المجهود المبذول المنتظم المستمر اللى انت بتعمله من النهارده علشان يكون مرتبك 5000 دولار بعد 5 سنين، ايه المجهود المبذول المقصود المنتظم المستمر اللى انت بتعمله علشان تحصل على وزن مثالى بعد 5 سنين ؟

من الأخر علشان تعرف ترد على الاسئلة الاولى لازم يكون عندك هدف واضح ومحدد واتجاه تتجه ناحيته وتقوم وتعمل مجهود منتظم

مستمر مقصود ومقصود هنا معناها انت محدد هتعمل ايه بالضبط وهتعمله امتى وازاى هتعمله ومستمر معناه مستمر فى كل الاحوال

حتى لو الظروف مش سامحة حتى لو ملكش مزاج هتستمر ومنظم معناه يكون منظم بوقت وتاريخ محدد وليس بشكل عشوائى .

ابحث وركز و اعمل كل حاجة ممكن تعملها النهارده علشان بكره وبعده

واشوفك المرة الجاية وحياتك لسه فيها أكتر