مقالات إيهاب ماجد

مقالات

حياتك لسه فيها أكتر

حياتك لسه فيها أكتر

عملت كل حاجة ولسه مش حاسس أنى مبسوط ، خرجت ورحت فى كل مكان مع ناس من كل نوع ، دخلت فى علاقات كتير من كل شكل ولون ، عملت كل اللى يخطر فى بالك وبرضه مش مبسوط ، شربت ورحت عن الدنيا وبرضه مش مبسوط ، حاسس أن حياتى مالهاش معنى ، نجحت وكسبت وبرضه لسه مش حاسس أنى مبسوط، الناس بتشوفنى بتحسدنى وبتعتبرنى ناجح ومبسوط ولكن الحقيقة لما أرجع وأقعد مع نفسى الاقى صراع كبير جوايا مش قادر عليه ، فأرجع أهرب واشغل نفسى بحاجات كتير وعندى أمل أنى الاقى اللى بدور عليه واللى أنا مش عارفه أصلاً ، وكأنى بأدور على قطة سوده فى غرفة عاتمة وأصلاً القطة مش موجودة .

حسيت قبل كده بالأحساس ده، كأنك بتدور على شئ انت مش عارفه ، مش عارف انت عاوز أيه ، مش عارف انت بتدور على أيه ؟

خلينا نرجع شوية لما كنا صغيرين كنا بنشوف ان الحياة هى بس حضن ماما ، وشويه شويه عرفنا ان فيه حد تانى بيجى بالليل ويمشى الصبح بيسموه بابا فكبرت الحياة شويه ، وساعتها بس عرفت ان حياتك كان فيها اكتر ( بابا ) وبابا كان موجود قبل حتى انت ما تيجى الدنيا، بس انت مكنتش عارف ، يعنى كان موجود فى حياتك بس مكنش موجود فى ادراكك ، وشويه شويه ظهرت حاجات وناس كتير كانوا برضه موجودين قبل كده فى الحياة بس مش موجودين فى أدراكك انت ، جدو وتيته والجيران وصحابك وقرايبك واكتشفت ساعتها ان حياتك فيها اكثر

فاكر اول مرة رحت فيها الحضانة أو المدرسة وتخيلت ان بابا وماما مش راجعين تانى ومش هتشفهم تانى ، مع ان ده مش حقيقى لكنك تخيلت انه حقيقى واتصرفت كأنه حقيقى .

طيب ازاى ده بيحصل تانى دلوقتى فى حياتك وانت كبير ؟

بتحس ان اللى انت عاوزه مش موجود ، احلامك واهدافك مش موجودة ، وان الحب الحقيقى موجود بس فى القصص والاساطير ، وأن الصداقة تكاد تكون مش موجودة

خلينى أقولك حاجتين:

الاولى ان اللى مش موجود فى ادراكك مش معناه انه مش موجود فى الحياة هو بس مش موجود عندك انت ، يعنى لو انت مش شايف الشمس دلوقتى ده مش معناه انها مش موجودة هى موجودة بس فى مكان تانى .

الحاجة الثانية الحياة لسه فيها أكتر ، أجمل الايام انت لسه معشتهاش ، أحلى الاوقات لسه مجتش ، اجمل ما فى الحياة لسه لم تراها بعد .

أيه رأيك تيجى نجرب حاجة مختلفة ؟

استنونى المرة الجاية وحياتك لسه فيها أكتر




القوة بين ايديك

القوة بين ايديك

جربت مرة تكون عاوز تشترى حاجة ولما رحت المحل سألت علي الحاجة اللى انت عاوزها بس ملقتهاش ، سألت عليها فى محل تانى برضه ملقتهاش ، رحت ماشى وروحت اليبت من غير ما تشترى حاجة .

مرة تانية طقت فى دماغك تشترى حاجة تانية ولما نزلت تشتريها برضه ملقتهاش ، بس المرة دى قعدت تدور عليها وتلف وتلف وما روحتش بيتك إلا وهى معاك . ايه الفرق مع انك انت نفس الشخص فى المرتين ؟

خلينى أقولك فى المرة الاولى الحاجة دى ممكن تكون مش ليك أو مش مهمة أوى بالنسبة لك فى الوقت ده ، أو شايف انها ممكن تتأجل لوقت تانى علشان عندك حاجة أهم ، أو ربما مزاجك مش تمام ، وممكن تكون حاسس انها مش هتعمل فرق كبير فى حياتك ، أو تكون حاسس انها مش مسئوليتك انك تجيبها ، أو تكون عارف انك مش هتلاقيها لانك جربت مرة قبل كده وملقتهاش ، ممكن تكون حاسس انك هتتعب لو لفيت عليها وبرضه مش هتلاقيها ، أو أصلاً تكون بتتلكك ونفسك متلقهاش علشان تريح نفسك او حتى علشان توفر الفلوس او علشان تقول لنفسك وللى بعتك تشتريها بكل ثقة " مش قلتلك !

المرة التانية الموضوع مختلف تماماَ ، لما الحاجة دى طقت فى دماغك بدأت تتخيلها وتشوف نفسك وهى معاك وانت مستمتع بيها ، وعرفت ان حياتك هتكون احسن لما تجيبها ، وحسيت انها هتشبع رغبة عندك ، وممكن تخليك مبسوط ، وكنت مصدق ده كله وده خلى رغبتك تزيد وخلى الحاجة بقت مهمة جدا وحسيت انك مش تقدر تعيش من غيرها ، كمان كنت واثق ومصدق جداً انها موجودة وانك هتلاقيها وكمان كنت مستعد تتعب علشان تجيبها ماكنتش بتفكر فى التعب اد ما بتفكر فى السعادة لما تجيبها وده كله خلى مزاجك تمام وفجر جواك قوة خليتك تدور بشكل مختلف وتفكر بشكل مختلف وتسأل بشكل مختلف وتتصرف بشكل مختلف القوة دى كانت موجودة بين ايديك فى المرتين بس كانت مستنية حاجة تحركها وتفجرها وتوجهها.

ركز معاى واسمع بقى ، اللى حصل فى المرة التانية هى دى نفس الطريقة اللى ممكن توصل بيها لحلمك سواء كان حلمك تشترى قميص اوتشترى عربية ،سواء كان حلمك تكون موظف عادى او صاحب شركة ، طالب عادى أو عالم يغير الدنيا كلها ، وهى دى القوة اللى بين ايديك تقدر تستخدمها فى اى وقت انت عاوزه دلوقتى .

واشوفك المرة الجاية وحياتك لسه فيها أكتر و وراء كل بداية .




أول خطوة

أول خطوة

زمان وأنا فى الثانوية كان فى مدرس انجليزى اسمه مستر منير كنت بحبه أوى وهو كمان ، قلى مرة لو عاوز تنجح يا إيهاب وتجيب مجموع كويس أعمل بالنصيحة دى ، قلتله " ايه هى " قال " خلى هدفك النجوم علشان لو وقعت تقع بين السحاب " قلت " مش فاهم " قال " يعنى لو كان حلمك تنجح وخلاص وتجيب 50% ده ممكن يخليك تسقط ولو كان حلمك تجيب 100 % ده ممكن يخليك تجيب 95 .

ومن ساعتها قررت ان دايماً تكون أحلامى النجوم ، وانى ما أقبلش إلا الأفضل ، سمعت مرة مقولة بتقول من الغريب عندما ترفض الجيد وتصمم على الافضل فأنك مع الوقت تحصل علي الأفضل .

أول خطوة خلى هدفك النجوم

أكتب قائمة بالحاجات اللى مش هتقبلها تانى فى حياتك ، أكتب قائمة بالحاجات اللى مش هتقبلها تانى فى شخصيتك وعاداتك وافكارك ، قولها بصوت عالى مش هأقبل اكون تابع لحد ،مش هأقبل افكارى السلبية عن نفسى ، مش هأقبل اكون كداب ، مش هأقبل اكون مستهتر فى حياتى ، مش هأقبل أضيع وقتى تانى ، مش هأقبل اكون حد عادى كده وخلاص ، مش هأقبل اكون عصبى .......

واكتب قائمة تانية بالحاجات اللى بتتمنى أنك تكونها وتكون موجودة فى حياتك وشخصيتك ، أكتب أفضل سيناريو لحياتك الجاية ، قول بصوت عالى مش هأرضى غير انى أكون صادق ، متميز ، إيجابى ، مش هأرضى غير انى أكون محترف فى شغلى ، مش هأرضى غير انى أكون منظم ومقدر لوقتى وحياتى ، قولها بصوت عالى وكله ثقة وايمان مش هأرضى غير انى أكون نموذج لجيلى والاجيال اللى جاية ،مش هأرضى غير انى أكون سبب فخر لعائلتى ، مش هأرضى غير بالأفضل ..

دلوقتى عاوزك تغمض عينيك وتخيل نفسك بعد ما بقيت اللى أنت عاوز تكون عليه ، وتخيل انك بقيت الانسان اللى انت بتتمنى تكونه ، واستمتع وحس القوة دى جواك وبين ايديك وقرر من دلوقتى انك هتتصرف حسب الحياة الجديدة اللى انت تستحقها ، تخيل ده مرتين وثلاث مرات كل يوم وهتلاقى نفسك بسهولة يوم ورا يوم بقيت زى ما انت عاوز .

واشوفك المرة الجاية وحياتك لسه فيها أكتر والقوة بين ايديك




تيجى نجرب حاجة مختلفة ؟

تيجى نجرب حاجة مختلفة ؟

تيجى نجرب حاجة مختلفة ! اعرف قيمة اللى عندك

غمض عينيك وتخيل فجأة أن كل حاجة فى حياتك أختفت كل الحاجات الوحشة والكويسة كمان .

بيتك ،غرفتك ، سريرك ، شغلك ، بابا ، ماما ، أخواتك ، حبيبك ، حبيبتك ، زوجك ، زوجتك ، ولادك ،أصدقائك ، كله كله ......كل الحاجات اللى بتحبها واللى مش بتحبها . وبعدين تخيل حياتك من غير ده كله هتبقى شكلها عامل ازاى وهتعيش ازاى !

دلوقتى غمض عينيك تانى وتخيل فجأة ان الحاجات دى كلها رجعتلك وشوف وحس وافرح بالحاجات اللى فى حياتك وعبر لهم عن فرحتك بوجودهم فى حياتك واشكر ربنا على كل ده .

دى طريقة سهلة وبسيطة ولكنها مؤثرة جداً للى بيجربها بجد ، بتعرف بيها قيمة الحاجات اللى فى حياتك وانت مش حاسس بيها ، بتشوف بيها حاجات مش شايفها بالرغم انها موجودة فى حياتك.

جرب مرة تغمض عينيك او تحط عليهم منديل وتعيش ساعة واحدة بس من غير عنيين . جرب مرة تسكت خالص من غير ما تنطق ولا كلمة وحاول توصل للناس اللى عندك واللى حاسس بيه من غير ما تتكلم .

جرب مرة تضع ذراعك اليمين فى جيبك ولا تخرجه لمدة يوم وعيش حياتك بذراع واحد. ولاحظ وحس وشوف قيمة ما تملكه واللى احيان كتير بنحس انى الحاجات دى أمور طبيعية وطبيعى انها تكون موجودة .

خلينى اقولك حاجة اخيرة قبل ما أشوفك المرة الجاية دلوقتى انت عرفت حاجات ممكن تجربها وتشوف نتايجها وتغير بيها احساسك وحياتك ، بس خلى بالك الكلام لوحده مش بيغير حد ، علشان تتغير لو عاوز تتغير لازم تجرب مرة واتنين وخمسين لحد ما تتغير زى ما انت عاوز .

واشوفك المرة الجاية وحياتك لسه فيها أكتر وأول خطوة .