QA

هكذا أجبت


- أنا في ثانيه ثانوي ومش بعرف أقعد أذاكر أكتر من ساعة أو أقل وبزهق بعدها عاوز أحل المشكله دي علشان اﻹمتحانات ع الابواب ؟

"مشكلتنا فى المذاكرة أننا مش بنحبها وده بسبب الضغط النفسى اللى بيمارسوه علينا أهالينا  منذ الصغر ، أول حاجة تعملها انك تحب المذاكرة وتعرف انها الوسيلة الآساسية  لوصولك لأحلامك وأهدافك وأن مفيش بديل تانى ، ذاكر لمدة م بين النص ساعة وساعة وبعدين خد راحة عشر دقايق اعمل فيها حاجة بتحبها وافتكر حلمك وحارب علشانه ."




- ٳزاى نخلى ولادنا يحبوا المذاكرة ؟

"لازم أحنا نذاكر قدامهم لأن التربية بالقدوة قبل أى حاجة تانية ، ونخلى باستمرار وقت المذاكرة وقت ممتع وكله لعب ، ونبسط ليهم المذاكرة فى شكل ألعاب او أغانى أو فوازير ، نستخدم الألوان والرسم فى الشرح ، نحول المواد ٳلى قصص كلها ترقب وٳثارة  وأهم حاجة انتوا كوالدين تغيروا من فكرة المذاكرة علشان الناس وانهم يذاكروا علشان نفسهم ."




- الواحد يعمل ٳيه علشان يغير من الصفات السلبية ؟

"أول حاجة تحدد كل الصفات السلبية اللى عاوز تغيرها ، وتحدد صفة واحدة وتكون بسيطة وسهل تغيرها ، علشان لما هتغيرها ده هيرفع من تقديرك لنفسك ويديك دفعة أن تكمل على حاجات أكبر ، اعرف أن كل صفة سلبية موجودة فى شخصيتك هى حل لمشكلة تانية موجودة فيك يعنى أنا مثلا لو بكدب فده لانى مش شجاع مثلا أو مش بعرف أواجه ، بعد ما تعرف أنت ٳيه المشكلة الأساسية ، حلها وبكده  السلوك الظاهرى بيختفى لوحده ."




- دلوقتي أنا في اولي جامعه وحاسه ٳني معنديش ثقه كافيه يعني مشكلتي كلها هي قلة الثقة ومش عارفة أعمل ٳيه ؟وحاسه انه في وقت كتير بيضيع مني والمفروض أستغله وأني أول مادخلت الجامعة كنت بفكر في اﻹمتياز دلوقتى بقول حتي لو جبت مقبول دا يبقي كويس وشايفه أن الجامعه دا عالم غريب مش هو اللي كنت أقصده

"فعلا بدون الثقة بالنفس الحياة صعبة جدا، والثقة بالنفس هى أساس كل نجاح تقدر تحققه فى حياتك ، علشان يبقى عندك ثقة بالنفس أعرف حقيقة نفسك أنك اعظم مخلوق خلقه الله وأن سبحانه وتعالى سخر لك السموات والارض من أجلك انت ، ثق أن لديك من القدرات التى تؤهلك للنجاح ، العلماء يأكدون أن قدراتك غير محدودة ، ويمكنك صنع المعجزات لو صدقت ، ويمكنك قراءة كتابى مفاتيح النجاح وحدها لا تكفى فهو ملئ بالتمرينات التى تزيد من ثقتك بنفسك بشكل ملحوظ وسريع ."




- أنا عايزه أعرف يعنى ٳيه قانون الجذب وممكن أقرا عنه فى كتاب ايه ؟

"يعنى قانون الجذب ببساطة ، ان ما يفكر فيه العقل ويصدقه يستطيع أن يحققه ، وللأسف هذا القانون يعمل سلبياً او ٳيجابياً ، فاذا كنت تفكر فى أشياء ٳيجابية سوف تتحقق وٳذا كنت تفكر فى أشياء سلبية سوف تتحقق أيضاً ، ولكن هناك فهم خاطئ لقانون الجذب يجعل الناس يكتفون بالتفكير فقط دون العمل ، فالتفكير هو الخطوة الأولى ولكن عليك بعمل كل ما يمكنك عمله للوصول لما تريد ."




- عاوز أكون مدرب تنمية بشرية أعمل ايه؟

"كويس انك عاوز تبقى مدرب وتساعد الناس ، بس المهم انك تكون عاوز ده مش علشان شهرة أو فلوس المهم تكون عاوز ده علشان تساعد الناس ، علشان تكون مدرب تنمية بشرية ناجح أهم حاجة أنك تكون ناجح فى أى مجال أنت بتختاره ويكون عندك تجارب حياتية ومهنية علشان التدريب مش واحد خد كورس تدريب مدربين وذاكر كام كتاب علشان تبقى مدرب فعال ومؤثر لازم يكون عندك تجارب وخبرات حياتية تنقلها للناس وكمان تكون مطبق الكلام اللى بتقوله وبكده يطلع الكلام من القلب ٳلى القلب ."




- أكيد كل واحد فينا عنده موهبة  أنا أكتشف ازاى موهبتى ؟؟؟؟؟؟

"كل الأديان والفلسفات بتأكد ان ربنا حط جوه كل واحد فينا ميزة فريدة تخصك لوحدك ، علشان نقدر نكتشفها ، أول حاجة قرر انك تعمل كل اللى انت بتعمله بكفاءة، أى حاجة تعملها أعملها كالمحترفين ، وسع حدود تجاربك الشخصية ، اتعلم حاجات كتيرة ، وأثناء ده هتلاقى حاجة وأنت بتعملها بتستمتع وبتتعلمها بسرعة وبدون تعب تلاقيك بتتقنها وتبدع كمان وفى نفس الوقت بتفيد الناس بيها هى دى موهبتك خد بالك ومتستعجلش الموضوع محتاج صبر ."




- أنا 3ث عام وبكره اللغات جداً بتاخد مني وقت رهيب في المذاكرة و بزهق بسرعه  عندي هسهس الثانوية ومرعوبه بيجيلي اكتئاب كتير وسعات بمشي ألاقي عيوني بتدمع من الخوف والخنقه أعمل ايه؟

"أول حاجة لازم تعمليها انك تبطلى تفولى لنفسك أنا بكره اللغات ممكن تسميه مواد محتاجة تركيز ومجهود أعلى ،وبعد شوية تقولى مواد فيها تحدى لأن العقل بيصدق أى حاجة هتكرريها ويحولها ٳلى واقع ابحثى عن طريقة تحفظى بيها الكلمات بسهولة وده موجود على اﻹنترنت ، و أما بالنسبة للزهق السريع ذاكرى فى البداية نص ساعة ووخدى ريست 5 دقائق ابداى كبرى النص ساعة بالتدريج لحد ما توصل ٳلى ساعة وبعدها خدى ربع ساعة راحة  وركزى على الأسباب اللى ممكن تخليكى تذاكرى ، يعنى شوفى وحسى نجاحك ده ممكن يخليكى عاملة ازاى قدام نفسك وأهلك واصحابك ."




- عندي مشكله ف تنظيم الوقت والمذاكره.. 3ثانوي علمي علوم ؟

"الوقت هو أهم مورد للانسان ، ابدأ أول حاجة بتحديد الوقت المتبقى لك فى اليوم بعد المواصلات والمدرسة والدروس والنوم والأكل وغيره ، وبعدين قسم المواد على الساعات المتبقية ، وابدأ يومك بالمواد الصعبة مش السهلة ، وممكن تستفاد بوقت المواصلات فى المراجعة ، أو الحفظ مثلا ً ، خد قرار وابعد عن أى مشتتات أثناء المذاكرة زى الموبيل والفيس بوك وكده ."




- أنا عندي مشاكل گتير مع الدراسة ومعنديش ثقة فى نفسي وگل ايفنت حضرتك تعمله ماما مترضاش تخليني أجي أنا حاسة اني هضيع وماما مش فاهماني خالص أنا في 3ثانوى عام علمي رياضة؟

"شوفى الثقة ممكن تيجى من القراءة فى مجال الثقة وممكن تقرأى كتابى مفاتيح النجاح وحدها لا تكفى هيفيدك جداً فى موضوع الثقة بالنفس ، أما بالنسبة لماما فأنت محاجة تعرفى الأول انها اكيد بتخاف عليكى مش قصدها خالص تضايقك انتى بس محتاجه تختارى الوقت والطريقة المناسبة معاها وتحاولى تديلها كل الضمانات انك هتبقى فى أمان ."

ارسل سؤالك هنـا